
Liewe Covid
Amper twee weke terug, Dinsdagoggend nadat ek klaar aangetrek was, en reg was om Beatrix skool toe te vat, tref ‘n onverwagse aankondiging my vol tussen die oë. Bea toets positief vir Covid en ons, as naaste kontak, moet vir tien dae afsonder. Goed en wel, dis ‘n hele omwenteling vir almal. Almal moet van huis af werk en kinders kan nie skool of kleuterskool toe gaan nie. Gelukkig het alles redelik goed verloop. Dan het Pappa met kinders gekuier, dan weer Mamma en tussendeur speel Amelia heerlik op my bed en ons lees en kyk aanmekaar boekies.
Mamma help Bea met skoolwerkies sodat sy nie heeltemaal agter raak nie. Ek dink dis baie goed dat die skole ingestel is, noudat die virus nie sommer wyk nie, om aanlyn goed te stuur wat afgerol kan word; of as die kinders nie internet het, die papiere na hul per slakkepos gestuur word.
Gelukkig het die regering van die dag besluit dat daar nie meer tien dae geïsoleer hoef te word nie. Hul skuif dit na sewe dae. Ek kry die kennisgewing dat ek op die sewende dag moet toets of ek negatief is. Indien wel kan ek die agtste dag uit isolasie kom.
Ons sien almal uit na dag sewe, of eintlik is dit ekke wat daarna uitsien. Ek voel nie regtig simptome nie; duime vas die hele tyd dat dit negatief gaan wees. In die tussentyd begin veral Mamma en toe ook Pappa nie lekker voel nie. Dit hoes en proes. Die toets kom positief uit. Mamma is regtig baie sleg. Ek bekommer my nogal want alles lyk beslis nie belowend nie.
Nou wonder ek toe of ek nou nog ekstra sewe dae moet isoleer saam met hulle. Mamma het uitgevind dat die isolasie net van die eerste persoon, wat positief is, getel moet word. Dus is ek steeds reg om dag sewe te toets sodat ek Beatrix kan skooltoe vat omdat die ouers wat positief is dit nie veronderstel is om te doen nie.
Ongelukkig werk dinge toe nie so uit soos daar gehoop is nie.
Ek vat die sewende aand die toets en raai wat? So positief soos kan kom! Ek het wel so effense krapperige keel gehad met ‘n hoesie die oggend al. Die aand versleg my hoes en voel ek al slegter. My voete was yskoud toe ek die oggend wakker word. Die weer het ook heel afgekoel en snags is dit al regtig koud. Ek sal vir my ‘n kombersie moet koop om oor te gooi vir ekstra warmte.
Daarna loop my gesondheid afdraende. Ek bly vir twee dae behoorlik in die bed en rus, rus, rus. Staan net op om teetjie te maak en pap of ‘n toebroodjie te maak.
Pappa voel toe heelwat beter en neem Bea skooltoe en gaan haal haar weer.
Gisternag, dis nou die derde nag, sweet ek my gedaan. Ek kry die vreeslikste nagmerrie. Deurmekaar, maar ek onthou presies wat ek gedroom het.Ek gaan nie hier vertel nie want dis diep uit my verlede uit. Ek gaan dit wel aanteken ingeval ek dit dalk een of ander tyd in ‘n vertelling kan gebruik.
Vanoggend toe ek wakker word voel ek sommer heelwat beter. Ek is bly dat dit nie in my bors getrek het nie. Nou moet ek my eie sewe dae klaar afsonder en dan is ek weer vry om rond te beweeg na veertien dae van ingehok te wees.
Beatrix het vir my die mooiste skilderstukkie gegee wat sy by die skool gemaak het.
Sy praat iets van chips wat sy geverf; dis nou die ronde blou kol waarvan sy praat.

Baie dankie vir die nuus! Ek het gewonder oor jou/julle.
LikeLike
Gaan gladnie lekker so met die wegtrek uit my bekende na onbekende vreemde dinge. Geestelik sukkel ek maar om oop gemoed te bly.
LikeLiked by 1 person
Ag dis regtig goed. Onthou net mens kan dit weer kry. Gelukkig is julle gespuit. Sterkte Vat dit maar nog kalm
LikeLike
Nou gooi jy weer koue water op die eend se rug. Ek wil nie weer dit kry nie. Beslis noe nou al nie.
LikeLike
Ai Ineke, baie sterkte! Ek dink aan jou.
LikeLike
Dankie Dina, my gees is maar besig om ook ‘n dip te vang. Voel alleen en verlore op oomblik saam met siek voel ook.
LikeLiked by 1 person
Sterkte. Hoop julle is almal gou heeltemal gesond en op die been.
LikeLike
Dankie, ek hou duime en tone vas sodat almal weer na hul normale daaglikse werk toe kan gaan en uit mekaar se pad kan wees.
LikeLiked by 1 person
Dis nou ‘n ding! Dis ‘n lang tyd om so ingehok te wees in die koue weer. Ek is bly dit gaan beter met almal.
LikeLike
Ja wat, ongelukkig kan mens niks daaraan doen nie. Het vandag ‘n entjie gaan stap maar was poegaai na dit.
LikeLiked by 1 person
As jy moeg is, rus en slaap , kry ure in die son vir vit D. Luister na jou lyf. Herstel vat tyd.
LikeLike
Dankie Appeltjie, dis nie kinderspeletjies om so te wees en te voel nie. Goed jy noem die sonskyn. Het gelukkig soggens son deur my kamervenster.
LikeLike
Sterkte Scrapy, probeer bietjie direkte son op jou vel ook kry en forseer jouself om te beweeg al maak dit jou poegaai, dit help met suurstofsirkulasie
LikeLike
Dankie Positief. Voel vandag na amper drie weke in isolasie tonne beter. Het bietjie gaan stap en dit het my die wêreld se goed gedoen. Hoop die ou virus wyk nou uit my gestel uit.
LikeLiked by 1 person
Hoop is word sommer gou-goiu beter Ineke! So jammer te hoor, julle het omtrent deugeloop met die Covid!
LikeLiked by 1 person
Dankie Aletta, was op stadium skoon moedeloos toe ek dit op einde kry en self vir nog sewe dae afsonder. Voel vandag baie beter. Is asof die virus sy houvas verloor het.
LikeLike
Ek is so bly Ineke, vat dit asb rustig💕
LikeLike
Maak beslis so.
LikeLiked by 1 person