Dis weer ‘n nat en reënerige Maandag hier by my. Gelukkig nog nie te koud nie. Daar het wel die naweek so stof-sneeutjie op hoë gebergtes geval. Dit het gemaak dat die dae so bietjie kouer was.
Ek loop al meer as drie weke en dink aan die volgende storie. Die woord ‘bok’ het in my kop bly draai. Daar is ‘n mooi verskeidenheid van woorde wat met bok begin. Ek het toe al begin om ‘n storie uit te dink. So paar aantekeninge gemaak en gisteraand voor ek gaan slaap het ek eers neergeskryf waaraan ek dink. Ook maar goed ek het dit gedoen want eks sekere vanoggend sou ek nie meer alles kon herroep nie.
Volgende wat ek toe doen vanoggend is om Kritzinger se Verklarende Afrikaanse Woordeboek oop te maak by ‘bok’. Wat ‘n ontdekking! Daar is sommer ‘n menigte bok-woorde. Die woordeboek is nog die 1959 uitgawe; stokoud en bruin van ouderdom.
Hier volg ‘n lys van ‘bok’-woorde wat jy kan gebruik om jou storie mee te skryf. Jy kan almal gebruik; net ‘n paar of sommer ‘n eie woord vat om oor te skryf.
Woordelys:
Bok – herkouende dier
Bokbaaivygie – vetplant
Bokbaard – spits kenbaard soos n bok.
Bok-bok-staan styf – seunspeletjie waar hul op mekaar spring.
Bokhael – om mee te skiet, lopers
Bokjol – primitiewe vrolike plaasdanse.
Bokkapater – gesnyde manlike bok.
Bokkesprong, bokspring – krom spring soos bok, kaperjol
Bokknieë – broek met bakkerige knieë soos bokknieë
Bokmakierie – kleurvolle voël
Bokooi – vroulike bok
Bokram – manlike bok
Bokseil – groot seil om teen reën te beskerm
Bokveld – deel van Karoo; doodgegaan
Bokwa – groot sterk wa, getrek deur osse
Bokwagter – iemand wat bokke oppas; oujongnooi
Bokwagtersny – baie dik sny brood
Bokwavrag – soveel as wat op n bokwa kan kom, groot hoeveelheid.
Bokwiet – soort graan
Indien jy aan nog kan dink kan jy gerus byvoeg.
Bokdinge
Josef, die bokwagter, sit rustig op die ou bokwa wat al jare onder ‘n bloekomboom staan. Die wintersonnetjie skyn warm op sy bene hier waar hy sit in die koue Bokkeveld. Hy vryf oor sy yl bokbaardjie. Die blou rokie trek lui van sy, in koerantpapier gedraaide, zol. Om Josef begin die bokbaaivygies hul veelkleurige gesiggies draai na die sonnetjie. Die stoute bokkapater maak dat die bokooie goed bokspring asof hul besig is met ‘n regte bokjol in die stadsaal. Hy bly hul terg met sy eie bokspronge. In ‘n kampie staan Kaspaas, die bokram, en blêr. Hy is jaloers, en wil ook saam met die boktrop loop.
Josef loer na die klomp kindertjies op die werf. Dis ‘n hele gegil en geskree soos die kinders bok-in-die-hok speel. Die groot kinders wat die bal gooi is daarop uit om die kleintjies raak te gooi. Almal is nou uitgevang. Die groot seuns besluit dis genoeg. Hul begin met Bok-bok-staan-styf. Hoe later hoe kwater. Die een wat sy rug moet hou moet meestal die hele bondel seuns op sy rug kan hou. Hul doen sulke wilde bokspronge dat daar nie regtig kans is om te bly staan nie.
Ma Santjie roep die kinders: “Kom, kom, kom, gooi die bokseil uit sodat jul kan kom sit om die bokwiet uit te sorteer!”
“Ag maaaaaa, ons speel nou eers!”
Ma gooi ‘n bokwavrag uit op die seil. “As jul gou maak kan elkeen ‘n bokwagtersny tuisgebakte brood kry met dik botter op.”
“Yummy, lekker,” hul begin vinnig sorteer.
‘n Bokmakierie begin lustig in die hoë boom sing:
”Bok-bok-ma- kierie-kierie.”
Josef skrik wakker. Sy bene kraak met die afklim van die bokwa. Sy ou verslete broek het bokknieë van al die sit. Hy besef dat hy vinnig sal moet maak om by die boktrop te kom. Hy wil nie hê dat die boer hom met sy bokhael peper omdat hy nie by die trop is nie. Josef het nou sommer ‘n huppel in sy stap na sy rokie en die warm sonnetjie wat hom weer woema gee.
Fluit-fluit my bokstorie is uit.
… … …
Skryf jou eie storie en gebruik soveel woorde soos wat jy wil. Plak jou skakel dan asseblief in my kommentaar sodat ek en ander lesers ook jou storie kan geniet. Sien en hoor weer volgende Maandag.
=== === ===
Dankie aan die volgende twee wat verlede week geskryf het. Ek waardeer jul ondersteuning ten seerste.
Appeltjie
https://appeltjie.wordpress.com/2021/05/10/maandagwasdag-11-vrywillige-naastehulp/
Toortsie
https://toortsie.com/2021/05/10/wasdaguitdaging-vrywillige-hulp/
Kreukels en plooie 
Laat ‘n boodskap