Daars hy, weer ‘n Wasdag en goet wat opgehang moet word.
Ek het die helfte van die week al begin dink om radio te gebruik die week. Loop ek toe met Trompie, en daar kom draadloos toe in my gedagtes en die idee steek sommer vas.
Geniet die skryf want dis Afrikaans. Afrikaans is mos lekker. As jy voel om ‘n stukkie te skryf is jy welkom om jou skakel in my kommentaar te plak. Ander sal ook graag jou skryfsels wil lees.
Draadloos
Voor ek oor draadloos skryf besluit ek om eers die woord op te soek. Ek het ‘n oeroue Verklarende Afrikaanse Woordeboek. Uitgegee in 1961.
Die volgende word gesê van draadloos
Draadloos – radio (dis nie wat ek soek nie)
Draadloos – sonder draad, sonder vesel
Draadloosstasie – toegruste plek waarvandaan ‘n draadloosdiens beskikbaar is
Draadloostoestel – instrument om uitgesaaide items op te vang en weer te gee
Nou ja, kyk maar hoe jy die draadloos(sonder klere?) sien.
My ondervinding van draadloos het eers heelwat later gekom as meeste mense omdat ons in die begin jare nooit een gehad het nie.
Ons het eers 1958 se kant ‘n radio gekry. Daar was ‘n draadloos in ons sitkamer. Ons kon net vyf uur die kinderprogram of stories luister.
Spannend: Frits Deelman en die ruimteskepe van mars.
Ons kon nie wag om te kan luister na die volgende aflewering nie.
Ook Staal Burger was iets waarna ons uitgesien het.
Ons trek plot toe in 1960 en ek gaan hoërskool toe. Daar was nooit krag nie dus was ons draadlosie een wat met batterye gewerk het. Ons kon net sekere tye luister want die battery moes gespaar word. Daar was saans weer om die draadlosie vergader om na “Die du Plooys van Soetmelksvlei” te luister.
Smiddae het my ma altyd Springbokradio se “Die geheim van Nantes” geluister. Ons het eers teen drie uur van die skool af gekom en kon nie gedurende skooltyd luister nie. Net vakansies het ons saam met my Ma luister.
Daar was ook ‘n musiekprogram(naam ontgaan my) waarna ons soggens kon luister. Ek dink dit was half tien tot tien uur, want tienuur moes ek ons bokke uitvat om te gaan wei.
Dan was daar Vrydagaande LM radio met hul musiek uitsendings. My pa het nie juis veel ooghare vir die Ruk en Rol musiek gehad nie, daarom kon ons nie elke Vrydag luister nie.
Iets wat ek wel weet is dat my Pa snags laat na ‘n Hollandse stasie geluister het; veral sokkerwedstryde.
Dit dan ‘n bietjie oor my draadloos ondervindings. Goeie ou dae gewees.
2017 gepubliseer.
Dankie aan die volgende ouens wat oor verlede week se Tema geskryf het:
Kameel
https://kameel179438031.wordpress.com/2021/01/26/kameel-brand/
Christa
Lekkervurig
Baie dankie weereens, jul maak my Maandag=Wasdag die moeite werd.
Kreukels en plooie 
Laat ‘n boodskap